Keynote Speech Ephorus dalam Konas Diakonia HKBP 2019

GABE PARASINIROHA MA HAMU SONGON AMAMUNA PARASIROHA I (Lukas 6 : 36)

Penulis: Pdt. Dr. Darwin Lumbantobing (Ephorus HKBP)

ISBN: 978-979-1155-77-9

Penerbit: L-SAPA, Pematangsiantar 2019

Percetakan: Percetakan HKBP, Pematangsiantar

Adong do dua ragam taringot tu panangkasion Kristologi – hamesiason ni Jesus, i ma, Christologi Ontologi – marlapatan, manangkasi hamesiason manang hakristuson ni Jesus. Na naeng alusan disi i ma: ise do, manang aha do hamesiason ni Jesus i. Songon dia do, jala boha do hamesiason ni Jesus i. Aha do pardomuanna tu Debata, Ama i dohot parasinganna sian Debata. Angka i ma dipatorang marhite Kristologi Ontologi.

Dapot hita do alus taringot tu si. Isarana, di na sinungkun ni Jesus angka siseanNa. Ise do Anak ni Jolma i mangihuthon hamu? Alus ni si Petrus. “Kristus, Mesias ni Debata do Ho” (Mateus 16:15).

Di pudian ni ari, ditotophon huria do muse panindangion haporseaonna. Isarana ponggol paduahon taringot tu Jesus Kristus. I do Anak ni Debata na sasada i. Na tinubuhon ni si Maria, na gabegabean sian Tondi Porbadia andorang so habubuhan – (dohot udutna) – I ma panindangion na marrumang Kristologi Ontologis.

Adong do muse Kristologi fungsional. Marhite Kristologi on, na naeng botoon jala antusan i ma: aha do na niula ni Jesus? Marhua jala aha sangkap dohot tujuanNa umbahen na ro Ibana? Asa manangkasi na niula ni Jesus do sangkap Kristologi Fungsional. Dialusi ma sungkunsungkun i marhite na patoranghon na niula ni Jesus. Dipatorang ma na binahenNa. Dipaboa ma na ni ula ni Jesus saleleng di hasiangan on Ibana.

Dua do na tardok pangarimpunan ulaon ni Jesus, na binahenNa saleleng di ngoluNa. Parjolo, pamalum na marsahit. Paduahon, patupahon ulaon parasinirohaon. HataNa, pangajarionNa dohot jamitaNa hira di bagasan na dua on do. Marhite na dua panghobasion on, dipatuduhon ma manang dipaboa ma naung songgop harajaon ni Debata.

1. Harajaon ni Debata

Na parjolo patubegehon haroro ni Harajaon ni Debata di Padan na Imbaru i ma si Johannes Pandidi. Impola jala sintuhu ni jamitaNa i ma: Pauba hamuma rohamuna, ai nunga songgop harajaon ni Debata. (Somalna, molo di evangelium Mateus, didok “Harajaon Banua Ginjang i” (Mat. 3:2).

Harajaon ni Debata i ma molo masa lomo ni roha ni Debata, manang molo saut lomo ni rohaNa di tongatonga parngoluon ni hajolmaon. Lomo ni roha ni Debata di hajolmaon i ma asa mian di bagasan holong masihaholongan.

Asa, hasasaut dohot hapapatar ni Harajaon ni Debata di tongatonga ni hajolmaon i ma molo jumpang lomo ni roha ni Debata di parngoluon ni jolma. Hataridaanna i ma: masihaholongan, masiurupan jala patulushon ulaon na denggan na hinalomohon ni Debata.

2. Sori ni ngolu na masa

Ragam do sitaonon ni jolma na masa di tingki panghobasion ni Tuhan Jesus di Palestina. Masa do ragam ni sahit, na mampanghorhon tu ngolu pardagingon dohot tu ngolu partondion. Masa muse hapogoson, haraparon hinorhon panggosagosa ni angka sitiop huaso. Torop ma na marsahit, na pogos jala ndang adong na manganturehon parngoluon ni natorop. Ndang adong padengganhonsa. Sude masiahut na di ibana be. So ada marpanarihon tu dongan jolma.

Panghorhon ni na masa i, gabe torop ma na pogos na so sian dalanna jala na so tingkina. Torop do hira na dibahen halak do asa marpogos donganna. Angka na marsitaonon pe songon i do. Burju do ibana mulaulaon, jala marparbue do na niulana. Hape ndang sahat tu ibana parbue ni na niulana. Pangalaho sisongon i mambahen torop halak marsahit. Marsahit dagingna, marsahit nang tondina. I do umbahen na torop halak hatiha i gabe mapitung, ndang boi mardalan, mangungu, jala ragam parsahiton. I do umbahen na torop halak disonggopi tondi na hodar dohot ragam ni sahit partondion. Ai marpanghorhon do hahipason ni tondi tu hahipason ni pardagingon.

Pangalaho sisongon i ma na tarida marhite jamita ni si Johannes Pandidi. Di na pinangidona asa paubahon roha, ro do angka sijalo beo: “Guru, dia do sibahenonnami?: Alusna, “Unang ma buat hamu lobi sian na niaturhon tu hamu”. Dohot do nang angka soldadu: “Ia hami dia ma sibahenonnami?” Alus ni Johannes Pandidi: “Unang ma susai, unang ma dobo hamu halak! Halashon hamu ma gajimuna”. (Lukas 3:12-14).

Asa marhite pangalaho ni sijalo beo dohot angka soldadu i torop do halak marpogos jala marsahit, sahit pardagingon dohot partondion. I do alana, ditingki disungkun Jesus sahalak partondi na hodar, “Ise do ho” – dialusi: “Loksa do ahu” – “Legion do ahu” – kumpulan prajurit/tentara (Lukas 8:13). Asa sitaonon, parsahiton dohot hapogoson masa ala ni panggosagosa ni halak sitiop huaso di tongatonga ni masyarakat. Lapatanna, sitaonon i masa ala nunga songon struktur parngoluon ni masyarakat dohot na manguluhon masyarakat.

3. Ise do siasian?

Tutu ma na nidok ni Jesus, “alai anggo na pogos sai na adong do di tongatongamuna” – (Joh. 12:5-8). Maksudna, asa unang pola sundat patuduhon holong ni roha tu Tuhan Jesus – marhite ragam na boi patupaon, holan ala manarihon na pogos.

Alai ringkot do patupa ulaon parasinirohaon. Alai tu na patut manjalosa ma. Asa ndang holan ala male, gabe lehonon ma mangan. Ai adong do na so ra mangula ulaonna. Angka jolma sisongon i, “na so ra mangula, unang ma mangan” (2 Tess. 3:10-11). Dipohul sigurbak ulu do nian indahanna, hape pola susa rohana pasuanghon tu pamanganna (Poda 26 : 15).

Asa na ingkon siurupan i ma halak na manaon sitaonon, na ginosagosa hapogoson, na olo haruar sian hapogoson, alai ndang tarbahensa haruar. Sai tongtong do ibana di bagasan hapogoson, atik pe sai dilului ibana do dalan asa malua sian sitaonon. Alai ndang tarbahensa. Sai tongtong do ibana mangalului dalan asa haruar sian sitaonon, alai ndang tarbahensa. Angka i do na ingkon siurupan.

Ringkot do parrohahonon hata na dipangke taringot tu ulaon parasinirohaon, i ma splagnazomai. Hira hata tulut do i. Ai marlapatan “use butuha bolon” marnida na masa manang sitaononna i.

Somalna sian hata ateate do dipangke patuduhon panghilalaan. Isarana, malengleng ateate, marsak roha manang marsak ateate. Hape “splagnazomai” – “use butuha bolon” – patuduhon marsak marnidasa siala parniahapan, sitaononna i. Asa gabe ringkot urupan na pogos marhite angka siulahonon si songon i ma na tinuju ni hata on; na pasali Jahowa do manang ise na mardenggan basa tu napogos, jala Ibana mamaloshon denggan basaNa tu ibana, Poda 19 : 11, sibahenon, isarana sipanganon.

4. Pangalaho Sipasidingon

Adong do pangalaho hadakdanakon di halak Batak (childish), alai olo do sai lohot gabe bangko sahat tu pangalaho ni halak na magodang.

a). Parbencutbencut Ndang pola tangis nian, alai sai murhing bohina. Hirahira naeng tangis idaon. Molo sinungkun aha na pinangidona, ndang olo mandok. Maloniba do mansurasura na dirohana. Dung nilehon na di rohana i, minar ma bohina. Alai saleleng so nilehon na di rohana i, holan na bencut do ibana. I ma jolma parbencutbencut.

b). Pardandidandi

Holan na mardandi ibana. tangis alai ndang hira na tangis. Ndang olo angkupan, ndang hapangkulingan. Sai murhing ma bohina jala marungutungut, marhata metmet. Alai dung nilehon na dirohana i, minar ma bohina jala olo ma panghulingan.

c). Partangistangis

Molo adong dirohana naeng jaloonna, manigor tumatangis do ibana. Hira sinjatana do iluna i laho mangido sipangidoon. Marnida i halak na marnidasa, olo ma asi rohana. Disungkun ma aha na hinalomohon ni rohana. Asa hira na tangis i do dalanna mangido sipangidoon na di rohana i.

d). Pangellemellem

Patuduhon bohina asa hira siasian ibana, jala dipangido ma sipangidoonna. Olo do laos marjanji manang marbagabaga ibana tu halak hasahatan ni si pangidoanna i, asa dilehon dirohana. Asa molo malo ibana mangellem, gabe olo ma dapotsa, ala nunga dilehon na niellemna i.

e). Pangidoido

Pangalaho ni jolma sipangidoido i ma angka na holan sumarihon dirina. Aha na adong di dongan, ingkon adong di ibana. Dalanna i ma mangido. Ragam do di bahen dalan, manang ingkon marpadan sipata, asal ma dilehon na pinangido ni rohana. Dung dapotan ibana, olo ma lupa na pinadanhonna.

f). Panehenehe

Mangido sipangidoon sian donganna alai huhut paburnangburnang dirina, asa dilehon na pinangidona i. Olo do sipata ingkon pola paroaroa donganna ibana. Jala mamujimuji donganna na boi mangalehon na di rohana i, asal ma saut na pinangido ni rohana. Di hata nuaeng, panehenehe, gabe ulaon provokasi – paroaroa dongan asa dapot ibana. Nian na onom pangalaho i, pangalaho sihadanakdanakhon do i(childish), alai olo do laos tongtong lohot pangalaho on sahat tu na magodang. Asa ndang tu jolma sisongon i na sinangkapan ulaon parasinirohaon i.

5. Pangalaho na Tang (magodang)

Anggo pangalaho ni halak Batak na magodang hira dihasubanghon do pangalaho sihametmeton i. Torop do halak Batak na pogos, alai arga do hadirion ni halak Batak. Nang pe so mamora ibana, manang ndang sadia artana, alai arga do halak Batak di dirina. I do umbahen na adong hata ni halak Batak: “Metmet sihapor, alai dijujung do uluna”. Lapatanna, intap ni na boi, dipatuduhon do hadirionna. Isara ni na margugu, ndang dihasomalhon halak Batak so adong guguna. Intap ni na boi jala na tolapsa dilehon do na patut sian ibana. I ma patuduhon hadirionna. Asa tangkas do di halak Batak ugasan manang ulaon hatopan manang ulaon riperipe. Tangkas do di halak Batak pangantusion: “Asing do pidong lali, asing do leangleang. Asing do na marsali, asing do na mangalean”. Asa dihasubanghon halak Batak do pangidoido. Gari manjalo pangurupion, sipata bangkol rohana. Asa tutu do tangiang on: Hapogoson manang hamoraon unang lehon tu ahu, alai loas ma panganonku bohal na tinurpukhonmi tu ahu.

6. Marsiurupan

Alai ndang sai sarupa na masa di parngoluon on. Adong do halak na ringgas mulaulaon, jala denggan do na niulana hape laos so mararga na niulana. Isarana, na masa na parpudion, hinorhon ni pangalaho tengkulak.

Huroha, nunga adong sian na jolo pangalaho manang “sistem birokrasi” – “sistem kehidupan masyarakat” na mambahen ingkon marpogos masyarakat i. Lapatanna hira na “dikondisikan” asa marpogos masyarakat. Jala ndang na tolap ni masyarakat laho paturehon i sian dirina sandiri. Ingkon na adong do sian duru ni masyarakat, isara sian pamarenta manang sian huria paulihon sistem perekonomian na denggan.

Ai hinorhon ni pangalaho i do umbahen na tubu hapogoson. Masa ma na marsitaonon sian na so dalanna, jala sian na so tingkina. Asa manarihon angka na pogos ndada holan marsilehonlehon, manang marsibasabasa, alai dohot do padengganhon “sistem” na masa, mangalului pandaraman na denggan, maratur jala marruhut na denggan. Apostel paulus mansoarahon: “Marsiurupan ma hamu manaon na dokdok i, ai i do dalan patulushon patik ni Kristus i” (Gal 6:2). Patik ni Kristus i ma marsihaholongan. Asa manarihon dongan na hurangan, dongan na ringkot urupan, i ma dalan patuduhon na marsihaholongan di hita angka na porsea di Tuhanta Jesus Kristus.

Denggan do nang parrohahonon sosososo ni Apostel Paulus. Didok ibana tu huria na di Galatia, “Antong taulahon ma na denggan tu saluhut halak, alai gumodang ma tu angka dongan sahaporseaon” (Gal 6:10). Lapatanna, mandalanhon holong ni roha i pe tong do ingkon “realistis” – manghaholongi angka na dumonok tu iba, i do na parjolo jala na rumingkot.

Visi ni hurianta HKBP pe tong do marsoara taringot tu na mangurupi dongan jolma. Didok, HKBP gabe pasupasu tu portibi on (1 Musa 12:1-2). Portibi na ginoaranna sasintongna ndada holan dipangantusion “geografis”. Hombar tu na sinoarahon ni hata ni Debata, pangantusion taringot tu portibi marpardomuan tu pangalaho. Isarana, jolma na mian di bagasan haholomon – digoar ma – roha portibi. Asa pangalaho portibi i ma na mian di bagasan dosa, haholomon dohot angka siula hajahaton. Tusi ma hita mamboan barita na uli, pasupasu sian Tuhanta.

7. Nasa na binahenmu tu na metmet on na tu Ahu do i.

Di tingki dijaha Tuhan Jesus buku Jesaya songon na tarsurat di Lukas 4:18 i, na mambonai pangulaon ni Jesus Kristus. Asa hira hata borhatborhat tu panghobasion do na jinahaNa sian buku panurirang Jesaya i.

Dung i mardalan ma Jesus laho marhobas. Di panghobasionna i, jumpang ma pangulahonon dohot pambahenan songon na jinahana sian buku Jesaya i. Dipamalum angka na marsahit. Dipalua na tarrante ni ihotan ni tondi na hodar. Diapuli angka na marsak, dipatogu haporseaon dohot dilehon pos ni roha tu angka na mandele. Dilehon mangan dohot minum angka na male jala na mauas. Asa andorang di ngoluna di hasiangan on, nunga dipatulus Ibana ulaon na sahat tu Ibana.

Dung diujung ni panghobasionNa, andorang so dijehehon si Judas Iskariot Ibana, dipaingot ma natorop, dohot siseanNa, asa mangulahon ulaon parasinirohaon i. Disosoi ma asa sude na porsea tu Ibana mangulahon ulaon parasinirohaon. Jala diujung ni ulaon dohot panghobasionNa, ulaon parasinirohaon i do pangibulan manang pangarimpunan ni pangoloion tu Jesus Kristus. Ai didok,”Nda saluhut halak na mandok Ahu Tuhanna bongot sogot tu harajaon banua ginjang i, holan angka na mangulahon lomo ni roha ni Damang na di banua ginjang i do” (Mat. 7:21). Angka na mangula lomo ni roha ni Debata i ma na mangula hataNa, tona na tinonahonna. Asa marhite pandohan i ma muse antusanta sosososo asa mangulahon parasinirohaon. Ai didok: “Nasa na binahenmuna tu sada na metmet on, na tu Ahu do i” (Mat. 25:40).

Lapatanna, pangoloionta dohot parsombaonta tu Debata ndada be holan manatap dompak ginjang, tu banua ginjang – vertikal – alai nunga dohot tu angka na metmet na humaliang hita – horizontal. Haporseaon tu Debata, nunga ingkon patar tarida marhite holong ni rohanta tu angka na metmet, songon na ni igil ni Tuhan Jesus siulahononta.

Panutup

Di na tongon disuru Tuhan Jesus siseanNa asa laho borhat mangula jala marhobas, mulak ma nasida dung simpul ulaon i. Dihatahon angka sisean i tu Jesus las ni roha nasida ala margogo jala dipatau Tuhan i nasida mangula ulaon parasinirohaon, pabali tondi na jahat nasida marhitehite goar ni Tuhan Jesus (Lukas 10 : 17). Dung i didok Jesus ma “alai unang pola las rohamuna ala naung guru dokmuna angka tondi i. On ma tahe halashon hamu; naung tarsurat goarmuna di banuaginjang i (Lukas 10 : 20). Asa manang ise na mangulahon ulaon parasinirohaon i, nunga tarsurat goarna di banuaginjang di buku hangoluan i.

Jala di buku Pangungkapon didok do tu angka na monang na mangulahon hata ni Tuhan i di ngoluna, paboa na so tupa be sesaonKu goarna sian buku hangoluan i (Pangungkapon 3 : 5). Lapatanna molo diulahon do ulaon parasinirohaon tarsurat goarna di buku hangoluan i. Alai molo ndang manahan jala ndang diulahon ulaon naung dipasahat Tuhan i tu hita, na boi do sesaonNa goarna sian buku hangoluan i.

Asa taradoti ma ulaon parasinirohaon hombar tu parsuruon ni Tuhan i. Basabasa ni Tuhan i do taon 2019 on di hurianta ala dihaposi hita patupahon ragam ni siulaon tu angka na pogos, na so mardihadiha, na dangol, na marsahit, na sopot so marama so marina dohot ragam ulaon parasirohaon na asing. Dipargogoi Tuhan i ma hita mangulahonsa. Dilehon ma Tondi Parbadia i tu huriaNa, tu sude hita parhobas, angka sisean jala naposoNa laho mangula parsuruonNa. Marsangap ma ibana ala ni panghobasion i, jala dipasupasu huriaNa nang hita angka naposoNa hinorhon ni hatauon na nilehonNa mangulahon jala marhobas tu ulaon i. Asa hobas jala hibas ma hita mangulahonsa.

Epilog:

Gabe parasiniroha ma hamu! Ndada holan asa marsibasabasa. Jala ndang laho patubu pangidoido. Alai laho padengganhon pandaraman no ngolu do. Ai metmet pe sihapor dijujung do uluna.

Unang be adong hapogoson alani na binahen ni halak. Unang be adong panggomgomi na manganhon na di balian ni huruma. Ido dalan mangurupi na pogos.

Lam tu ampit na do joujou parasinirohaon di tingki on. Asa lam torop na manghilalahon denggan basa ni Debata, Parasiniroha i.